AKI YERUSHALAYIM #96
Se avlo, i se eskrivio tambien muncho, sovre los ”anusim”- termino adoptado ultimamente para los ke se uzava yamar, de antes, “marranos” o “djudios sekretos”; ma la verdad es ke asta el prinsipio del siglo pasado kaje i no uvo ningun istoriador ke se okupo de investigar seriozamente los diversos aspektos de este tema. Es solo a lo largo del siglo 20 ke empesaron a ser examinados, por un numero kada vez mas grande de istoriadores i investigadores de otras disiplinas, no solo la istoria de los anusim sino ke tambien sus kontribusion a la istoria i kultura de Espanya i otros paizes mas, sus ideolojia, la manera de la kuala se identifikavan i las razones ke los pusharon a mantener sus fidelidad a la relijion djudia, malgrado todos los peligros ke esto komportava.
Mensionaremos, a titolo de ilustrasion, a los mas konosidos de entre eyos: Marcel Bataillon de Fransia; Americo Castro, Antonio Dominguez Ortiz, Julio Caro Baroja i Francisco Marques Villanueva de Espanya; i de entre los istoriadores djudios: Cecil Roth, Yitzhak Baer, Haim Beinart, Israel Revah, Bentsion Netanyau i otros mas.
En el livro "אנוסים – זהות כפולה ועליית המודרנה" (Los Anusim – Doble Identidad i Empesijo del Modernismo), ke viene de ser publikado ultimamente, Yermiyau Yovel – Profesor Emerito de la Universidad Ebrea de Yerushalayim – trata de los diversos aspektos de esta kestion, analiza i deskrive en klaras palavras las tezas de los ke se okuparon de este tema, i a la fin del livro ekspoza su propia teza, bastante diferente de las de sus predesesores.
La primera konkluzion a la kuala yega Yovel es ke no se puede avlar de los anusim (i de sus desendientes, los bene-anusim), komo de un grupo omojeno, ke todos sus miembros tenian mas o menos los mizmos uzos, una fe o un ideal komun. Todo a la kontra – uvo entre eyos ke estavan firmemente konvensidos ke la relijion djudia era la mas djusta i verdadera, i ke estuvieron prontos a sakrifikarsen por eya, en los kemaderos de los autos-dafe; ma uvo tambien ke fueron djuzgados i kondanados por la Inikizision komo “djudaizantes” aun ke en realidad no eran ni djudios ni kristianos, sino ke agnostikos o ateistas, ke refuzavan de kreer ke ay un Dio ke kreo i rije al mundo, i al kual tendremos ke dar kuento de muestros aktos.
Un exemplo de los ke apartienen a este grupo es Fernando de Medina ke nasio en 1656 en el Sud de Fransia, en una famiya de konversos, paso a bivir en Espanya i despues en Mexico onde fue arestado por la Inkizision, siendo sospechado de “djudaizar”. El fue investigado durante 7 anyos en los kualos al prinsipio paresia estar pronto a tornar a la relijion kristiana, i aksepto mizmo de dar los nombres de otros anusim ke konosia; ma despues el deklaro a los ke lo investigavan ke tiene dudas sovre la existensia de un Dio i no kree ke ay un mundo vinidero, al kual iremos despues de muestra muerte. En otra interrogasion el disho ke no kree ke ay un Dio, ma afirmo, djuntos kon esto, ke el es djudio.
El eskrivano ke tomava de nota sus deklarasiones, adjusto ke a la vista Medina kere ke “lo tomen por loko”, ma la verdad es ke fueron los inkizitores i el eskrivano ke no entendieron ke se tratava de un muevo fenomeno: atamiento al puevlo i a su identidad istorika, sin relasion a una kreensia relijioza.
De otra parte topamos tambien, en Espanya, no pokos konversos ke se distingieron por la ardor de sus fe katolika i mizmo por sus esforsos de yegar a un nivel espiritual aun mas alto de la relijion kristiana. El exemplo mas konosido es el de Santa Teresa de Avila, ke aun ke era desendiente de un konverso ke fue kemado en un auto-da-fe, sovresalio por la ardor de su atamiento a la relijion katolika i kreo el mistisizmo katoliko de Espanya.Otro exemplo muy famozo, es el de Fray Luis de Leon, profesor en la Universidad de Salamanca, ke fue kondanado por la Inkizion a 6 anyos de prezo, por averse atrevido a trezladar al espanyol el “Kantar de los Kantares”, malgrado la defensa de la Iglezia de meldar i estudiar los tekstos biblikos i aun mas de esto, traerlos a la konosensia del ancho publiko.
El echo mizmo ke estas dos tan eminentes personalidades del mundo kristiano fueron investigadas, i en el kavzo de Fay Luis de Leon i otros mas, fueron mizmo kondenadas a prezo, malgrado la sinseridad de sus fe, mos da una idea de la atmosfera de espanto en la kuala bivieron durante siglos los anusim i sus desendientes. Eyos estavan a la mersed de los malsines ke los denunsiavan, o mizmo de las konfesiones ke los inkizidores ekstraiyan kon torturas de los ke eran sospechados de “djudaizar”. Eyos eran ovligados a dar los nombres de sus parientes, amigos i konosidos kon los kualos partisipavan a las orasiones ke azian o a los ritos ke kumplian, permetiendo ansi de yegar a numeros aun mas grandes de konversos sospechados.
Durante los serka de 300 anyos ke la Inkizision fue aktiva en Espanya ansi ke en Italia i en Amerika Latina, los konversos tuvieron ke bivir una doble vida: komo kristianos afuera de sus kaza, i komo djudios adientro, akavidandosen en la mas grande mizura posible a ke sus atamiento a la relijion djudia no sea konosida por la Inkizision. Eyos eran amenazados kontinualmente por la grande red de espiones ke eskudrinyavan todo el tiempo, a ver ken no komia karne de puerko, ken ayunava en el Dia de Kipur, ken vistia kamiza limpia o ensendia kandelas tadre de Shabat etc.
Esta doble vida i la inkietud ke los ovligava a akavidarsen todo el tiempo afin de no ser deskuviertos, marko el karakter i la identidad de los anusim de una manera tan fuerte ke eya puede ser rekonosida en sus sigientes jenerasiones tambien, mizmo en los paizes a los kualos emigraron de Espanya i Portugal: Fransia i Italia, Flandres (oy Beljika), ‘Holanda i Inglitierra i sovre todo los paizes del kontinente amerikano ke fueron konkistados por las potensias evropeas de entonses.
Esta dualidad ansi ke la inkietud de la kuala avlimos, el espanto de ser deskuvierto por los ke los persegian, kreo un tipo de personas ke no se someten a las desiziones de las autoridades sino ke son independientes i azen lo ke konsideran djusto; personas ke bushkan kontinualmente muevos kaminos i posibilidades para adelantar en la vida, sigun lo izieron, entre otras, en dezvelopando el komersio internasional entre Evropa i el Muevo Mundo. En ‘Holanda, por exemplo, eyos krearon toda una flotilia de naves ke le permetieron de ser una potensia maritima de primer grado, ke podia amenazar las linyas de navigasion entre Espanya i las Amerikas, aun ke del punto de vista militar no podia enfrentarse aviertamente kon las fuersas armadas espanyolas.
Esto i mas: la aviertura de los anusim i sus desendientes a muevas ideas, a inovasiones en el kampo de la relijion, de la filozofia, de la ekonomia i mizmo de las estrukturas politikas i sosiales, los yevo a ser un elemento reformador i inovador en las komunidades djudias ansi ke en la sosiedad en jeneral. La libertad de relijion i el komersio libre, ke son dos de los fundamentos de la sosiedad liberal en muestros dias, son tambien dos prinsipios de baza en la vida de los anusim, ke lucharon para kedar fideles a sus relijion i no akseptar la ke les era impozada, i despues de la ekspulsion, pozaron, en los paizes onde toparon refujio, los fundamentos del komersio internasional libre.
Yovel pensa ke los anusim kontribuyeron tambien en una grande mizura a los trokamientos ke tuvieron lugar, a lo largo de los anyos, en las relasiones entre la relijion djudia i el puevlo djudio, ansi ke en la kreasion de una sosiedad laika, al lado de la ke kontinua ainda a bazarse sovre la relijion, i esto no solo en lo ke toka al mundo djudio sino ke tambien en el mundo en jeneral.
Visto el espasio limitado de este artikolo, no podremos alargarmos mas sovre este aspekto i mos limitaremos a apuntar las konkluziones del autor sovre el grande intereso ke tiene para mozotros el estudio de la istoria de los anusim i de sus kontribusion a la kultura, ekonomia i otros aspektos mas de la sosiedad umana.
